Another Europe is possible

Senra saúda aprobación do regulamento produción ecolóxica da UE pero critica súa vocación neoliberal

22/11/2017

Senra saúda a aprobación do regulamento de produción ecolóxica da UE pero critica a súa vocación neoliberal

 

  • A Comisión de Agricultura do Parlamento aprobou hoxe un regulamento comunitario para a produción e etiquetaxe de alimentación ecolóxica
  • A deputada galega considera “totalmente necesario” este regulamento pero chama a abordar con contundencia os relevantes puntos febles

 

 

 

Bruxelas, 22 de Novembro de 2017. A Comisión de Agricultura do Parlamento Europeo (PE) aprobou hoxe unha proposta de regulamento do PE e o Consello Europeo a aplicar á produción ecolóxica e etiquetado de produtos ecolóxicos (axuntamos texto). No marco dun auxe exponencial do consumo deste tipo de alimentos nos países membro, e dunha cada vez maior concienciación por parte da cidadanía das repercusións que a alimentación ten na nosa saúde, a negociación interinstitucional deste texto a nivel comunitario presentou unha relevante complexidade que deu conta da multiplicidade de intereses económicos e políticos inherentes a este regulamento. Nestes últimos dous anos tiveron lugar até dezaoito xuntanzas PE-Comisión Europea-Consello Europeo para a súa elaboración.

 

Lídia Senra, responsábel na Comisión de Agricultura e Desenvolvemento Rural para o Grupo Confederal da Esquerda Unitaria Europea-Esquerda Verde Nórdica- (GUE/NGL), saudou hoxe a aprobación deste informe ao constituír “un instrumento necesario para a certificación ecolóxica, ferramenta á súa vez imprescindíbel para poder identificar os produtos ecolóxicos nos mercados”.

 

Aliás, o texto recolleu tamén cuestións especificamente positivas, como a incorporación do denominado “material heteroxéneo”. Así, até o dagora para producir en ecolóxico había que empregar sementes ecolóxicas incorporadas a un rexistro controlado maiormente polas grandes multinacionais das sementes, ou ben iniciar un proceso de solicitude de excepción. “Ao incluír agora no regulamento europeo o recoñecemento ao material heteroxéneo, se se aplica correctamente, pode servir de apoio ás asociacións de mantemento e intercambio de sementes e, en xeral, contribuír a que a alimentación estea na man das persoas e non unicamente na das corporacións privadas”, explicou a eurodeputada galega.

 

Non obstante, advertiu, “non podemos obviar que este é un acordo de mínimos”, xa que “non resposta satisfactoriamente ás reivindicacións de fondo e necesidades reais das labregas e labregos que precisamente levan loitando varias décadas para defender e socializar a agricultura ecolóxica e a agroecoloxía; por iso non podiamos apoialo co noso voto e decidimos absternos”

 

Nomeadamente, Senra criticou a clara intención deste informe de intensificar inda máis as dinámicas de comercialización mundial de alimentos ao redor do planeta, é dicir, someter á alimentación ecolóxica ás dinámicas comerciais neoliberais. “Para nós, a agricultura ecolóxica ten que ir máis aló, non pode entrar no comercio global de alimentos, senón basearse na produción de proximidade e de tempada. Até que punto podemos considerar como  ecolóxico un alimento que presenta o forte impacto medioambiental derivado do seu traslado a milleiros de kilómetros de distancia? Esas dinámicas comerciais contradín o propio significado que implica a agricultura ecolóxica”.

 

Outro dos aspectos que impedían que este informe contase  co voto positivo da eurodeputada galega foi o feito de que non recollese o establecemento de axudas para compensar as perdas das granxas ecolóxicas que se podan ver contaminadas involuntariamente, cuestión sobre a que Senra presentara emendas específicas a este informe. Aliás, este regulamento tamén adoece dunha excepcional permisividade con prácticas que distan moito de adscribirse aos preceptos de benestar animal que cabe supor á produción ecolóxica, tales como cortar o pico das aves ou a extracción de cornos.

 

En conclusión, “é importante que exista un apoio á produción ecolóxica por parte das institucións públicas, porque é unha posición que pode facernos avanzar cara unha transición no modelo que axude a afastarnos da actual agroindustrialización”, reflexionou Lídia Senra, “pero non podemos pechar os ollos diante da fortísima influencia das grandes multinacionais e dos gobernos neoliberais, que na súa obcecación por cooptar a toda costa todos os nichos de mercado, están dispostos a forzar a deturpación dos preceptos básicos da produción ecolóxica para sometela aos seus intereses”.

 

Conforme aos procedementos administrativos de regulamentación comunitaria, o informe aprobado hoxe na Comisión de Agricultura será sometido a votación en sesión plenaria do Parlamento Europeo, previsibelmente en abril de 2018.

 

 

 

Moitas grazas pola vosa atención

 

 

 

__________

 

Máis información:

 

Lídia Senra Rodríguez

Eurodeputada galega

Grupo Confederal da Esquerda Unitaria Europea/Esquerda Verde Nórdica (GUE/NGL)

 

Tlf: 609 845 861

lidia.senra@europarl.europa.eu      

http://ageuropa.gal/

@LidiaSenra

Contact Form

×